مسجد سليمان باشا الخادم

 و اخيرا افتتاح مسجد سليمان باشا الخادم اللى معروف بمسجد سارية الجبل بقلعة صلاح الدين الايوبي بعد ترميمه🤩

تم انشاء الجامع سنة 1528م و اتسجل و بقى من ضمن الاثار سنه 1951 م 

الجامع موجود فى القسم الشرقى من قلعة صلاح الدين الايوبي و متشيد على الطراز العثمانى ، و اللى بيميز الجامع انه متغطى بالقباب و متزود بالمأذن اللى واخدة شكل القلم و جدران الجامع الداخلية مكسيه ببلاط خزفى ،

بس فى الاساس الجامع كان متشيد للجنود الانكشارية اللى دخلوا مصر سنة 1517 م مع السلطان سليم ، و سكنوا داخل الاسوار الشمالية للقلعه بعد ما جزء كبير من مسجد الناصر قلاوون اتهدم و مبقاش صالح لاقامة شعائر الصلاة فيه .

الجامع واخد شكل مستطيل كبير من الشمال للجنوب و بيتقسم قسمين ، الاول مغطى و بيعرف باسم بيت الصلاة و ده بيمثل الجامع نفسه ، القسم التانى مكشوف و يعرف باسم الحرم او صحن الجامع .

بدأ مشروع الترميم من سنة 2018 م و افتتح الجامع سنة 2023 م و تكلفة الترميم 5 مليون جنيه ،

اللى اترمم ( الضريح من الداخل و الخارج و الزخارف اللونيه بالقاب الداخليه و الواجهات و تنظيف الاحجار المتسخه و ترميم الرخام و بيت الصلاة و المنبر الرخامى ) ،

و افتتاح المسجد بقى اضافة جديدة للاماكن الاثرية اللى نقدر نزورها فى قلعة صلاح الدين الايوبي و بكدة هيزيد الحركة السياحية فى القلعه ، 

ده غير انهم حالين شغالين على منطقة خدمات الزائرن اللى هيبقى فيها كافتيريات و بازارات و جراچات .

Dr. Mostafa Waziry 🫡