ابو جعفر المنصور

 فتح ( عيسى بن على ) الكتاب اللى فيه اسم ولى العهد امام الحاضرين من بنى هاشم 📃

 و كان اسم ولى العهد هو ( ابو جعفر المنصور ) اخو ( ابو العباس ) و بعد ابو جعفر يتولى ابن اخوه ( عيسى بن موسى ) 👀

 طيب مين ابو جعفر المنصور ده 🤔

اسمه هو ( عبدالله بن محمد بن على ) و يبقى تانى الخلفاء العباسيين✌🏻

تولى الخلافة سنة 136 ه‍ لما ابو العباس مات 😞

يعتبر ده المؤسس الحقيقى للدولة العباسية 👳🏻‍♂️

 طب ازاى تانى الخلفاء و ازاى المؤسس الحقيقي للدولة العباسية؟ 

هخليك انت اللى تجاوب بس كمل المقالة دى و المقالة اللى هتنزل بعدها 🫣

 لما ابو جعفر تولى الخلافة واجه صعوبات كتيرررر و اول و اهم الصعوبات هى خروج عمه ( عبدالله بن على ) عن طاعته و كان فى خطر فى التمرد ده لان عبدالله بن على كان عنده جيش كبير و غير كدة كان عنده مقومات مادية و معنوية و غير كدة اخوات عبدالله وقفوا فى صفه 😰

طب عبدالله بن على خرج عن طاعة ابو جعفر ليه ؟ 

عشان طلب بأحقيته فى الخلافة 🥲

 ف ابو جعفر لما سمع ان عمه خرج عن طاعته راح مدينة ( الانبار ) و خد الخزائن بتاعت اخوه ( ابو العباس ) و كون جيش كبير و على رأسهم ( ابو مسلم الخرسانى ) 😡

 كان عبدالله معسكر فى مدينة ( نصيبين ) راحله ابو مسلم و قاله انه والى الشام و عايز يستلم الشام و مجاش عشان يحارب عبدالله 🤷🏻‍♀️

بس عبدالله كان ذكى و مصدقش ابو مسلم و حاربوا بعض لمدة 5 شهور⚔️

و فى الاخر عبدالله بن على اتهزم و ابو مسلم انتصر 💪🏻

 هرب ( عبدالله بن على) و راح مدينة ( البصرة ) عند اخوه ( سليمان بن على ) و لما عرف ابو جعفر قال ل ( سليمان ) يسلم له عبدالله بس سليمان قال ان عبدالله مش عنده

 ف بعدها طلب سليمان من ابو جعفر الامان لعبدالله ف ابو جعفر وافق يديله الامان😍

 و لما اداله الامان راح عبدالله عند ( عيسى بن موسى ) و عاش معاه 😴

 بس عيسى بن موسى قال لابو جعفر ان عبدالله بن على مات

 بس ناس كتير قالت ان عبدالله اتقتل ف خاف عيسى بن موسى و سلم عبدالله لابو جعفر

 بس ابو جعفر ذكى بردو 😁

 بنى لعمه بيت فى قصر الخلافة عشان يكون قريب منه و بسرعه و بحيلة ذكية اتخلص منه 🫣

 كدة السؤال التانى 

تعرف ازاى ابو جعفر اتخلص من عمه عبدالله بن على؟

فاكر ابو مسلم الخرسانى 🤔

خاف ابو جعفر جدا منه لان نفوذه واسعه و لانه ( امين الدعوة العباسية ) و هو المعلن عن قيام الدولة العباسية و غير كدة الناس عرفته قبل ما تعرف الخليفة ف حس ابو جعفر ان لو ابو مسلم فضل عايش هيبقى خطر عليه و على الدولة العباسية 😰

طيب قتله ازاى 🤔

بعت ابو جعفر لابو مسلم رسالة عشان يجيله فراح ابو مسلم للعراق عشان يقابله بس ابو مسلم ذكى بردو 🤯

عين قائد بداله على الجند و قاله هبقى ابعتلك رسالة لو مختومه بنص ختم اعرف انها منى لو مختومه بختم كامل اعرف ان ابو جعفر غدر بيا و قتلنى😥

ابو جعفر امر الناس انهم يحسنوا استقبال ابو مسلم 🤝 

دخل ابو مسلم لابو جعفر 

ابو جعفر:- كنت عايز استشيرك فى شوية أمور

و فضلوا يدردشوا شوية لمدة كام يوم 

ف جى فى يوم و قال ابو جعفر لرجالته لما اعلى صوتى و اصقف تدخلوا و تقتلوا ابو مسلم 

و لما ابو مسلم جى و دردش مع ابو جعفر شوية راح ابو جعفر على صوته و صقف 👏🏻

دخلت الرجالة و قتلو ابو مسلم الله يرحمه 😩

فكر ابو جعفر المنصور شوية و قال لازم اتخلص من رجال ابو مسلم الخرسانى 😡

بعت لقائد الحيش رسالة بس الرسالة كان الختم عليها كامل ف عرف القائد ان ابو مسلم اتقتل 😓

 فقرر قائد الجيش انه ينتقم لموت ابو مسلم راح ابو جعفر قبض عليه و بعدها عفا عنه 🩵

بس استنا مهو دم ابو مسلم مش هيروح هدر كدة 🤌🏻🙆🏻‍♀️

ظهرت 3 حركات يطالبوا بدم ابو مسلم 

1️⃣ حركة ( الاستاذ سنباذ ) 

 و دى كانت سنة 137 ه‍ 

جمع سنباذ رجال كتير و راحوا لمدينة ( الرى ) و استولى على خزائن ابو مسلم اللى فيها 🫢

غير بقى عمليات التخريب و الجرائم اللى عملها ده غير انه قال انه رايح يهد الكعبة😡

بعتله ابو جعفر جيش و هرب سنباذ و اتقتل فى الاخر

2️⃣ حركة ( الرواندية ) 

 كانت فى خرسان سنة 141 ه‍ مطالبين بدم ابو مسلم 

دول بقى قالو ( ان ابو جعفر المنصور ربهم الذى يطعمهم و يسقيهم  ) 🤦🏻‍♀️ 

بس هما مقالوش كدة عشان هما بيعبدوه لا 🤌🏻😂

دول قالوا كدة عشان يخلوا الناس تغضب على ابو جعفر😡

حاربهم ابو جعفر و حبس 200 واحد منهم بس هربوا من السجن و حاولوا يقتلوه بس ربنا ستر و واحد اسمه ( معن بن زائده ) نجح فى حماية ابو جعفر و هزم الرواندية💪🏻

هنيجى لاخر حركة اللى و هى👇🏻

3️⃣ حركة ( الاستاذ سيس )

كانت سنة 150 ه‍ 

ادعى سيس النبوة عشان يحقق هدفه بس ابو جعفر بعتله جيش بقيادة ( ابنه المهدى ) و ( خازم بن خزيمة) و قدر خازم انه يقتل سيس😡

بس ظهروا تانى ( استنوا Part4 🤫 )    

هكمل فيه ابو جعفر المنصور بردو و هعمل خريطة بالاسماء اللى ذكرتها  🫣

متنساش تجاوب على السؤال 👇🏻

ازاى ابو جعفر اتخلص من عمه ؟

#نجوى_تيمور_صلاح 

#دوله_عباسية 

#هنسافر_بألة_الزمن 

#تاريخ