معبد دندرة ♥️

 هنسافر بألة الزمن⏳ و نرجع بالتاريخ للعصرين

 ( البطلمى_الرومانى ) 

موضوعنا النهاردة عن

 ( معبد دندرة ) 🤗

اولا كدة دندرة دى بتقع على الضفة الغربية لنهر النيل 🛶 اتعرفت فى النصوص المصرية القديمة بأسم ( تانترت ) و معناه ( الالهة ) و هنا كان يقصد المعبودة حتحور 🐮 

دندرة دى كانت عاصمة للاقليم السادس من اقاليم مصر العليا😍

اتذكر فى مصر القديمة انها كانت مسرح لمعركة بين حورس و ست⚔️

دندرة فيها المعبد الرئيسى للمعبودة ( حتحور ) و ( حور بحدتى ) و ابنها ( حور أحى )👨‍👩‍👦

و بالنسبة للمعبد الرئيسي فهو فى غاية الجمال و المعبد اسمه معبد حتحور🐮

طيب فى بقى نصوص بتقول ان المعبد ده من ايام الدولة القديمة

و اللى ساهموا عشان يبنوا المعبد كان ( تحتمس الثالث _ تحتمس الرابع _ رمسيس الثانى _ رمسيس الثالث )

بس المعبد اتشيد منذ اواخر ملوك البطالمة زى ( بطليموس السابع _ الثامن _ العاشر _ و الحادى عشر )🏛️

الجدار الجنوبى للمعبد منقوش عليه الملكة كليوباترا السابعة و ابنها قيصرون بيعبدوا ثالوث المعبد و الهة تانية🛐

و المعبد فيه تخطيط زى التخطيط اللى على معابد الدولة الحديثة و التخطيط اللى على المعابد اللى اتبنت فى العصرين ( اليونانى _ الرومانى ) 🏛️ المعبد ده فيه سور السور ده في بوابة اللى بتمثل مدخل المعبد و بعد كدة فى بهو كبير فيه 24 عمود بتيجان على شكل راس حتحور 🐮 و بتربط الاعمدة حاجة اسمها انصاف جدران و بتتعرف باسم الستائر الحجرية

السقف بتاع المعبد منقوش فيها ربة السماء ( نوت )😍

و بعد البهو فى صالة الاحتفالات و دى البداية الفعليه للمعبد🎊

و على جوانب مدخل الصالة اتنقش الاسماء بتاعت المعبودة حتحور🐮

بعد صالة الاحتفالات هنلاقى صالة تقديم القرابين htp di nsw بمعنى ( القرابين المقدمة ) و دى فيها موائد بيتقدم عليها قرابين للالهة🍽️

و على جوانب الصالة في سلالم بتطلع على سطح المعبد🏛️

و بعد صالة القرابين فى الدهليز و ده فى باب بيخرج لحجرة التطهير و دى كانت ليها دور مهم فى احتفال رأس السنة🎁

نيجى بعد الدهليز هنلاقى قدس الاقداس و ده اكتر مكان مقدس فى المعبد بي المكان ده محدش كان بيدخله غير الملك و الكاهن الاكبر👑

و حوالين قدس الاقداس فى ممر مرتفع عن سطح الارض و فيه 11 اوضة معروفة بأسم ( الحجرات المخفية ) زى حجرة عرش رع و حجرة البعث ....🧐

لكن ابرز معالم المعبد 🤩 هى ( مقصورة المعبودة نوت ) و ( الاقبية ) دى ممرات تحت سطح الارض و كانت مخازن سرية بيتحط فيها ادوات الطقوس الخاصة بالمعبودة حتحور 🐮 و بترجع لعهد الملك بطليموس 13 و فى سطح المعبد فى مقصورة اتحاد حتحور بقرص الشمس و حجرة الابراج السماوية🥰

#نجوى_تيمور_صلاح🌹🤗