معبد الاقصر

 عن طيبة الجنة الكون غني..والكل بيتعلم منا..

افكارنا حياتنا وتفنيننا والعالم كله يغنيلنا.. 😍

هنتكلم النهاردة عن ( امن بر ام ابيت ريسيت 👈🏻 بيت امون فى الحرم الجنوبى 👈🏻 معبد الاقصر ) 🥰و الاسم ده ظهر فى مسلة رمسيس التانى

فى سنة 1870 م اكتشف " اوغست مارييت " المعبد 🕵🏼و كانت الرملة مغطية المعبد لحد اكتاف تماثيل رمسيس التانى ، و أهل الاقصر كانوا عايشين فى بيوت وسط المعبد و مسجد ابو الحجاج 🏘️ ، راح " مارييت " اشترى البيوت دى و شال الرمل عشان يكتشف واحد من اهم المعابد لعبادة امون رع 🌞

 و لما شال الردم اللى على المعبد اكتشف موائد قرابين منقوش عليها اسم سنوسرت التالت ( الاسرة 12 ) و ده بيدل ان المعبد اتنشأ قبل عهد حتشبسوت و تحتمس التالت اللى بنوا مقاصير فى المعبد بعدها جى الملك امنحتب التالت و شيد المعبد اللى موجود دلوقتي ده و اللى شيده المهندس " امنحتب بن حابو " 👷🏼

طريق الاحتفالات 🎊

الطريق ده بيربط معبد الاقصر بمعابد الكرنك و الطريق اللى قدام معبد الاقصر موجود على جانبيه صفين من تماثيل ابو الهول ( شبس عنخ 👈🏻 الصورة الحيه ) و نفس الكلام فى معابد الكرنك بس الفرق بينهم ان الطريق بتاع معبد الاقصر فيه تماثيل ابو الهول لكن معابد الكرنك تماثيل كباش ( كبش امون ) اللى شيده امنحتب التالت ، 

فى سنة 1974 م الحفاير اكتشفت 70 تمثال لابو الهول من الحجر الرملى اتنقش عليه اسم الملك نخبتو ، و حفاير سنة 1991 م اثبتت ان الطريق بيبدأ من معبد الاقصر و بينتهى بالصرح العاشر لمعابد الكرنك و حتى معبد المعبودة موت ، و كان بيقام فيه طقوس عيد الاوبت 🎊 خلال الطريق بحيث يعبر موكب المعبود امون 🌞 من الكرنك متجه للحرم الجنوبى بالاقصر 🤗

اول حاجة هتقابلك هى مسلتين من الجرانيت الوردى واحدة شرقيه و واحدة غربية ، امر بتشيدهم الملك رمسيس الثانى و اللى شيدهم المهندس " باك ان خنسو " 👷🏼 بس طبعا اللى منه لله ( محمد على باشا ) فى سنة 1836 م اهدى المسلة الغربية لملك فرنسا 😡 ، و الحمد لله ساب المسلة الشرقيه 🙄 و اللى متسجل عليها اسماء الملك رمسيس الثاني و اسم المعبد ( امن بر ام ايبيت ريسيت ) 

 وجود المسلات جوا المعبد ده بيدى اشارة و اعلان لموقع المعبد ، ارتفاع المسلة الواحدة 22.5 متر ده من غير القاعدة ، و بالقاعدة 25 متر ، و وزن المسلة 257 طن ، و قاعدة المسلة منقوش عليها قرد البابون و هو بيقدس للمعبود امون 🐵

صرح المعبد 

مقسوم لقسمين جزء شرقى و جزء غربى 👀 و فى النص بوابة الدخول ، طول الصرح 65 متر و ارتفاعه 24 متر شيده الملك رمسيس الثاني و نقش عليه معركة قادش بالتفصيل ⚔️ و نقش خلف الصرح الشرقى الملك رمسيس الثاني و زوجته نفرتارى يتصدران الاحتفال بالمعبود مين ..... هو اسمه مين زى ما انا اسمى نجوى كدة ، عشان محدش يقولى ايوة مين هو المعبود ؟ 🥲

عند بوابة المعبد هتلاقى تمثالين جالسين للملك رمسيس الثاني و بيمثلوا كا الملك 👈🏻 قرين الملك و وظف ليهم كاهنين عشان يستقبلوا القرابين و التمثالين اتنحتوا من الجرانيت الاسود

فناء رمسيس الثاني 

و ده بقى بيتكون من 74 عمود على شكل زهرة البردى المقفولة ، بين الاعمدة هتلاقى 8 تماثيل لرمسيس الثانى و هو فى وضع الوقوف ، الفناء ده اتخصص لاستقبال الزورق الالهى فى عيد الاوبت 🎊 و طقوس الاحتفال منقوشة على الجدار الغربى و منقوش عليها ابناء رمسيس و تقديم القرابين و حروب رمسيس الثاني فى قادش ⚔️

فناء رمسيس التانى ده بينتهى بتمثالين فى وضع الجلوس من الجرانيت الاسود ( تماثيل الكا 👈🏻 القرين ) عشان يبدأ من بعدها ممر امنحتب التالت اللى فيه 14 عمود ، و اللى بيعتبر المدخل الحقيقى للمعبد

بهو امنحتب التالت 

ده بقى المدخل الحقيقى للمعبد 🤗 و ده بناه المهندس " امنحتب بن حابو " بأمر من امنحتب التالت و بيتكون من 14 عمود 🏛️ بس المرة دى على شكل البردى المفتوح 🪷 ، الممر بيحيطه سور منقوش عليه خراطيش باسماء ملوك ( امنحتب التالت _ حور محب _ رمسيس الثاني ) و منقوش عليها مناظر لعيد الاوبت 🎊 و خروج الموكب الالهى من معابد الكرنك من اول الصرح الثالث ، صورت المناظر على الجدارين خلف الاعمدة ، و فى تمثال مزدوج للمعبود امون و المعبودة موت مصنوعه من الالبستر و تقريبا كدة التمثال ده من عصر توت عنخ امون 🤷🏻‍♀️

فناء الاحتفالات لامنحتب التالت 🎊

ده بقى فيه 64 عمود و دى كانت صالة الاحتفالات من عصر امنحتب التالت لعصر رمسيس الثاني لان رمسيس التانى بدل فناء الاحتفالات ده بفنائه اللى فيه 74 عمود 🤷🏻‍♀️ 

امنحتب التالت شيد عمدان الفناء ده على شكل ساق نبات البردى ، و على مر السنين حصلت كارثة و اتسربت المياة الجوفية فى المعبد و اثرت على الاعمدة 🙀 عشاان كدة فى سنة 1988م بدأو يفكوا اعمدة المعبد ، و فى فبراير 1989م اكتشفوا بالصدفه خبيئة الاقصر المعروفة و اللى بتحتوى على 26 تمثال و دى تماثيل ملكية و الهيه و حفظت اغلبية التماثيل فى متحف الاقصر 🏛️ ، و لقوا شقافات من عصر الاسرة 26 تؤرخ وجود المعبد من عصر زوسر 🤔

اما صالة الاعمدة اللى ف الوش ده بقى اسمها صالة التجلى و الاشراق 🌅لان كان بيشرق فيها المعبود امون رع 🌞 لما بيخرج من قدس الاقداس و بتتكون من 32 عمود 

معظم مناظر الصالة دى مهشمة ، و فى منظر لاقاليم مصر المختلفة و منظر للملك امنحتب التالت قدام معبودات طيبة ( امون _ موت _ خونسو ) و الصالة ليها مدخلين كل مدخل بيؤدى لمقصورة صغيرة للمعبود خونسو و المعبودة موت🥰

ده بقى بقايا لمعبد رومانى و صالة لتقديم القرابين 🏛️ و بنقابل المعبد ده بعد صالة ال 32 عمود 👀 و ده عبارة عن بهو صغير فيه 8 اعمدة اتشالوا فى العصر الرومانى و استبدلوا بمعبد رومانى و اتخصص لعبادة أباطرة الرومان😡 ، و بعد كدة فى صالة بتتكون من 4 اعمدة قدام حجرة قدس الاقداس و اتنقش علي جدرانها اكتر من 40 منظر للملك امنحتب التالت و القرابين اللى بتتقدم للمعبودات 🤗