دوافع الحروب الصليبية

 و من الدوافع اللى ادت لقيام الحروب الصليبية الدافع الاقتصادى ،

 فى اوروبا عصور وسطى كانت اوروبا عايشة فى ظل النظام الاقطاعى و كانت الطبقات الدنيا بتعانى من مساوئ النظام ده ، و كانت العلاقة بين الامراء الاقطاعيين علاقة حرب مستمرة ، و حياة الفلاحين كانت مليانه مخاطر و خصوصا القرية اللى سيد الاقطاع مش بيحميها، اما بالنسبة لصغار لملاك فكانوا بيطلبوا الحماية من كبار الاقطاعيين ،

(اللى مش عارف يعنى اى النظام الاقطاعى _ الاقنان_ صغار الملاك ، هعرفهم فى بوست لوحده النهاردة بليل او بكرة بإذن الله ) ،و بسبب ان السيد مكنش بيحمى القرية ف اتعرضت الاراضى للنهب و السلب و التدمير ده غير ان كبار الاقطاعيين استولوا على الاراضى و وزعوها على بعض و ده غير الاوبئه و الفيضانات اللى اتعرضتلها اوروبا قبل الحروب الصليبية و كل ده كان سبب فى ان الزراعه تتدهور و اللى ادى الى انتشار المجاعات، طبعا ده كان سبب مهم جدا ان الاغلبية من الطبقة الدنيا تنضم للحروب الصليبية اللى كان املهم من الحروب دى انقاذ حياتهم و التخلص من الذل طب هما جابوا الامل ده منين ؟ هقولك من خطبة البابا فى مجمع كلير مونت لما قال ( ليس بوسعكم ان تدبروا فى هذه البلاد الطعام للسكان و هذا هو السر فى انكم تستهلكون سلعها و تشلون فيها حروبا لا نهاية لها ) ، بالنسبة للاشراف و النبلاء فكان هدفهم هو تكوين امارات و اقطاعيات لهم ،

و بالنسبة للمدن التجارية ( جنوة و بيزة و البندقية ) فكروا انهم لو انضموا للحروب الصليبية هيبقى عندهم فرصة يسيطروا على البحر المتوسط و بكدة هيسيطروا على الطرق التجارية ، 

و بكدة هنعرف ان السعى ورا المكاسب المادية سواء سياسي او اقتصادى هو الدافع الرئيسى للحروب الصليبية و ان الدين لم يكن سوى ستارة اختفت وراه الاطماع و الدوافع الحقيقية لكل اللى اشترك فى الحروب دى .

ج 5

#نجوى_تيمور_صلاح 

#الحروب_الصليبية 

#تاريخ